fbpx
Alb'swiss TV
Lajme

Kurti premton rritje të investimeve dhe reforma në arsim

Albin Kurti ka premtuar reforma në fushën e arsimit.

Kryeministri i Kosovës, mori pjesë në konferencën “Universiteti, politika dhe vlerat themelore të arsimit të lartë”, organizuar nga Konferenca e Rektorëve, në kuadër të aktiviteteve për 50-vjetorin e themelimit të Universitetit të Prishtinës “Hasan Prishtina”.

Kurti me këtë rast premtoi rritje të investimeve dhe reforma në arsim, pavarësisht gjendjes në këtë sektor, duke thënë se qeveria që ai drejton është e interesuar për zhvillimin e arsimit në vendin tonë.

“Ne në këtë mandat do të rrisim investimet dhe do të bëjmë reforma në arsim, por së pari duhet të dimë se ku jemi. Besojë që të gjithë pajtohemi se për momentin gjërat nuk janë dhe aq mirë se ka nevojë për ndryshim, ka nevojë për reformë, e cila e përgatit universitetin për t’u përballur me sfidat e kohës sonë. Kurrë nuk ka pasur Qeveri më të interesuar e më të përkushtuar për zhvillimin e arsimit që është parakusht për zhvillimin e vendit”, tha kryeministri Kurti.

Ministrja e Arsimit, Shkencës, Teknologjisë dhe Inovacionit, Hykmete Bajrami, ka shprehur zotimin e saj se nuk do të ketë ndërhyrje të politikës në punën e universiteteve.

“Unë e di që para një kohe ju keni mbajtur një konferencë të rektorëve me temën për të reaguar në ndërhyrjet politike dhe për t’u mbrojtur nga vendimet arbitrare të qeverisë. Unë sot në emër të Qeverisë së Republikës së Kosovës ju garantoj që praktika të tilla kanë përfunduar më 3 shkurt. Ju garantoj që ne do të përkujdesemi që të vëmë bazat me ligj që të mbajmë duart larg nga politika, politika të mbajë duart larg nga universiteti, në mënyrë që jo vetëm kjo qeveri, por edhe tjerat që vijnë më pas të respektojnë në tërësi pavarësinë e institucioneve edukativo-arsimore”, tha ministrja Bajrami.

Shefja e Zyrës së BE-së në Kosovë, Nataliya Apostolova ka kujtuar gjendjen e arsimit gjatë viteve të 90-ta dhe sakrificat e jashtëzakonshme për t’u arsimuar, duke e krahasuar me gjendjen e sotme, andaj edhe është deklaruar se arsimi në Kosovë është njëri nga prioritetet më të mëdha të tyre, ku edhe planifikojnë viteve të ardhshme të investojnë një milion euro.

“Këmbëngulja për t’i pasur fëmijët tuaj të arsimuar gjatë viteve ’90 edhe kur dyert e objekteve universitare u mbyllën për studentët dhe njerëzit hapën shtëpitë e tyre private për ta më mahnit mua. Në këtë kontekst e kuptoj dëshirën e jashtëzakonshme të rinjve në Kosovë për të ndjekur arsimin e lartë. Është e pabesueshme që numri i studentëve për kokë banori është dyfishi i mesatares së BE-së…. Ne e kemi vendosur arsimin si një prioritetet kryesore strategjike për aktivitetet tona në Kosovë, arsimi është një nga shtyllat e Agjendës Evropiane të Reformës “ERA” dhe së bashku me promovimin e punësimit është element shumë i rëndësishëm i programit të reformës ekonomike. Arsimi po bëhet gjithnjë e më shumë një prioritet në planifikimin tonë financiar, ne po planifikojmë të investojmë rreth 1 milion euro në sektorin e arsimit në vitet e ardhshme”, u shpreh Apostolova, raporton KP.

Rektori i Universitetit të Prishtinës, Marian Dema tha se UP-ja ka 14 njësi akademike për ngritjen në karrierë, por kanë edhe përsosmëri për trajnimet e mësimdhënësve në mënyrë që të mos mbesin mbrapa me vendet e Evropës për sa i përket metodave të ligjërimit.

UP u themelua me Ligjin mbi themelimin e Universitetit të cilin e miratoi ish-Kuvendi i Kosovës më 18 nëntor 1969.

Kuvendi themelues i Universitetit “Hasan Prishtina” u mbajt më 13 shkurt 1970, ndërsa më 15 shkurt u mbajt mbledhja solemne e Kuvendit dhe kjo datë u shpall Dita e Universitetit të Prishtinës.

Të ngjajshme

Xhelal Sveçla: Jo zgjedhje, ky është opsioni tjetër nëse dështon marrëveshja me LDK’në

news

Këto barnatore do të jenë të hapura sonte në Prishtinë

albswiss.com

Një fëmijë në mesin e të prekurve me koronavirus nga Gjilani

albswiss.com

Kadri Veseli: Qeveria Kurti po bëhet kundërshtarja më e madhe e Kosovës dhe SHBA-ve

albswiss.com

Komuna e Kaçanikut do të shpenzojë afër 3 500 euro për t’i akomoduar 35 në zyrtarë në Shqipëri

albswiss.com

MSH paralajmëron ashpërsimin e masave nëse nuk respektohen rregullat e lëvizjes

albswiss.com
error: Content is protected !!