fbpx
Alb'swiss TV
Lajme

Thaçi ia jep LDK-së mandatin për krijimin e qeverisë

Burime të besueshme të gazetës Objektiv brenda kabinetit të tij, kanë konfirmuar të hënën se nesër (e martë), Presidenti i Kosovës. Hashim Thaçi, do t’ia jap Lidhjes Demokratike të Kosovës (LDK), mandatin për krijimin e qeverisë së re.

“Po, Presidenti Thaçi do t’ia jap LDK-së mandatin për krijimin e qeverisë. Këtë do ta bëj zyrtarisht nesër (të martën), meqë Lëvizja Vetëvendosje (LVV) refuzoi ta marrë mandatin për krijimin e qeverisë së re”, ka thënë ky burim ekskluzivisht për gazetën Objektiv të hënën.

Sipas këtij burimi, vendimi i Presidentit Thaçi për t’ia dhënë mandatin LDK-së është bazuar në aktgjykimin e Gjykatës Kushtetuese, të datës 1 korrik 2014 dhe është mbështetur nga mendimet e zyrës ligjore, njohësve të Kushtetutës së Kosovës si dhe është konsultuar me partnerët strategjik të Kosovës.

Çështjen e ngërçit institucional të krijuar në Kosovë pas rrëzimit të qeverisë, Presidenti Hashim Thaçi, e ka diskutuar javën e kaluar në një takim edhe me ambasadorët e vendeve të QUINT (Shtetet e Bashkuara të Amerikës, Mbretëria e Bashkuar Gjermania, Franca dhe Italia).

Ndërkohë, LDK-ja që ishte pjesë e koalicionit qeverisës me Lëvizjen Vetëvendosje (LVV) dhe që inicioi rrëzimin e qeverisë së kryeministrit Albin Kurti, ka vendosur të provoj krijimin e një qeverie të re, nëse LVV-ja, si parti fituese e zgjedhjeve të 06 tetorit 2019, dështon ta bëjë një gjë të tillë.

Kryetari i LDK, ish-kryeministri Isa Mustafa, ka konfirmuar se ka marrë mbështetjen e shumicës absolute të anëtarëve të Këshillit të Përgjithshëm (KP) të kësaj partie si dhe miratimin e kryesisë së ngushtë, për një koalicion të mundshëm me Aleancën për Ardhmërinë e Kosovës (AAK) të Ramush Haradinajt, Nismën Socialdemokrate (Nisma) të Fatmir Limajt, Aleancën Kosova e Re (AKR) të Behgjet Pacollit dhe partitë që përfaqësojnë pakicat etnike në Kuvendin e Kosovës.

Të gjitha këto parti janë shprehur të gatshme të bëhen pjesë e një koalicioni qeverisës, që do të udhëhiqej nga LDK-ja.

Nëse do të arrihej, ky koalicion do të kishte potencialisht mbështetjen e 68 deputetëve, 7 më shumë se minimumi prej 61 votash për krijimin e një shumice parlamentare.

Kundër këtij formati është shprehur kryetarja aktuale e Kuvendit të Kosovës, Vjosa Osmani, e cila ka udhëhequr listën e LDK-së në zgjedhjet e 06 tetorit 2019.

Në mbështetje të saj ka dalë publikisht edhe një deputet i LDK-së, Haxhi Avdyli, por mund të ketë edhe të tjerë që mund të mos e votonin një koalicion të LDK-së me AAK-në, Nisma-n, AKR-në dhe pakicat.

Ndërsa, LVV-ja e Albin Kurtit dhe Partia Demokratike e Kosovës (PDK), e Kadri Veselit, sipas kësaj formule, do të mbeteshin në opozitë.

Por, procesi i krijimit të qeverisë së re, duke shmangur zgjedhjet e reja, kishte hasur në vështirësi, për shkak se partia fituese e zgjedhjeve të kaluara, LVV-ja, edhe pse e ka marrë mandatin për krijimin e një qeverie të re nga Presidenti Hashim Thaçi, nuk ka kthyer ende asnjë marrëveshje.

LVV-ja ndërkaq ka paralajmëruar se do ta kundërshtoj krijimin e një qeverie të re, ndërsa ka insistuar që qeveria që është në detyrë, e udhëhequr nga kryetari i saj, Albin Kurti, ta qeverisë Kosovën deri pas përfundimit të pandemisë Covid-19.

LVV-ja insiston se nuk mund të krijohet qeveri e re pa zgjedhje të reja, ndërsa partitë tjera politike këmbëngulin se një gjë e tillë është e mbështetur në Kushtetutë.

Në një bashkëbisedim me gazetarë të huaj, kryeministri në detyrë i Kosovës, Albin Kurti, citohet të ketë thënë se në rast krijimi të një qeverie të re duke anashkaluar zgjedhjet, në Kosovë mund të ketë destabilizim të situatës, duke paralajmëruar se partia e tij, LVV-ja, mund të mbështesë protestat e qytetarëve.

Edhe konstitucionalistët kosovarë janë ndarë në dysh sa i përket interpretimit të kësaj çështjeje.

Ata që mendojnë se mund të krijohet qeveria e re pa shkuar në zgjedhje i referohen Aktgjykimit të 1 korrikut 2014 të Gjykatës Kushtetuese të Kosovës, e cila kishte interpretuar çështjen e zgjedhjes së kryetarit të Kuvendit të Kosovës.

Kurse, ata që mendojnë se nuk mund të krijohet qeveri e re pa shkuar në zgjedhje, u referohen rasteve tjera në të cilat mocionet e suksesshme të mosbesimit ndaj qeverisë kishte prodhuar zgjedhje të jashtëzakonshme. /Objektiv/

Të ngjajshme

Kurir, Grenell-Vuçiqit: Pranoje Kosovën

albswiss.com

Mësohet se a ka pasur takim mes Kurtit e Osmanit gjatë ditës së sotme

albswiss.com

LDK-ja i ka mbledhur nënshkrimet për mocionin e mosbesimit, sot i dorëzohen Kuvendit

albswiss.com

Shërohet nga koronavirusi pacienti zero

albswiss.com

Ministria e Shëndetësisë publikon disa fotografi, tregon arsyen pse duhet ta lini duhanin në kohë pandemie

albswiss.com

KQZ vendos që zgjedhjet në Podujevë të mbahen, por me masa mbrojtëse

albswiss.com
Loading...
Loading...
error: Content is protected !!