7.2 C
Pristina
Saturday, October 16, 2021

Përleshje fizike mes Agim Ademit e Eroll Salihut? – Flasin nga FFK

FFK ka demantuar lajmin se presidenti Agim Ademi dhe sekretari Eroll Salihu, janë ‘rrahur’ me njëri tjetrin.

Shefi i shtëpisë së futbollit të Kosovës, Agim Ademi, dhe sekretari i përgjithshëm Eroll Salihu, e kanë mohuar se janë rrahur mes vete, në një letër të përbashkët publike, në të cilën, megjithatë, duket sikur e pranojnë se shpesh kanë mospajtime dhe argumente me tone të larta brenda institucionit të tyre.

Komunikata e plotë:

Ditën e djeshme në njërin nga portalet vendore u publikua një artikull me titull “Plas grushti: Agim Ademi dhe Eroll Salihu rrahën mes vete në zyrat e FFK-së”. Nuk e kishim ndërmend që t’i reagonim fare këtij portali, pasi synimi i tij i vazhdueshëm ka qenë të faktorizohet pikërisht me lajme të rreme dhe negative në raport me FFK-në, por fakti që opinioni dhe dashamirët tanë të shumtë u shqetësuan nga një artikull i tillë, e i cili u plasua edhe në disa portale tjera, na bëri që të sqarojmë opinionin si vijon:

Ju bëjmë me dije se në Federatë nuk ka ndodhur asnjë përplasje. Ne ishim njëri në vizitë pune në Gjermani, e tjetri në pushim me familjen. Sa i përket gjoja se ka plasur grushti ndërmjet nesh, ajo jo që nuk ka ndodhur, por nuk do të ndodhë asnjëherë.

Ne, mund të kemi debate ndërmjet veti dhe shpesh kemi pasur edhe mendime ndryshe, por gjithmonë mospajtimet tona janë zgjidhur brenda institucionit, ku çdo herë jepet dhe dëgjohet mendimi i gjithsecilit dhe në fund nxirret solucioni më i mirë.

Mund të ndodhë që debatet tona ndonjëherë të jenë edhe më tone më të larta, por ato thjesht janë pjesë e punës së përditshme dhe asnjëherë nuk vijnë në shprehje ofendimet apo gjërat që janë munduar të na i mveshin.

Ne, përveç se jemi në pozicionet drejtuese të FFK-së, si kryetar dhe sekretar i përgjithshëm, ka 15 vjet e më shumë që punojmë bashkërisht për futbollin dhe mbi të gjitha jemi shokë.

Prandaj, shkrimet për përplasje fizike janë absurde dhe rrena që i sajon një portal, i cili gjithmonë në raport me FFK-në nxjerr vetëm të pavërteta dhe gjëra negative.

Me këtë rast, kërkojmë nga të gjithë dashamirët tanë por edhe opinioni i gjerë që të mos të bien pre e këtyre lajmeve dhe njëherësh u kërkojmë falje për shqetësimin, por thjesht nuk dëshironin ta faktorizonim këtë portal për një të pavërtetë të tillë.

Ne, do të vazhdojmë bashkërisht të punojmë për t’i realizuar objektivat tona të FFK-së, për aq kohë sa do ta kemi mbështetjen e të gjithë atyre që janë të përfshirë në futboll.

Të Fundit
spot_img
Postime të ngjajshme
spot_imgspot_img