Ishte ndoshta një nga zinxhirët më të çuditshëm të ngjarjeve të regjistruara ndonjëherë në historinë detare. Një histori që përfshin tre anije, të mbytura në të njëjtin vend, në të njëjtën datë, por në shekuj të ndryshëm, pranë brigjeve të Uellsit, në Ngushticën Menai.
Anija e parë u fundos më 5 dhjetor 1664. Nga 81 pasagjerët që ndodheshin në bord, vetëm një arriti të mbijetojë. Emri i tij ishte Hugh Williams.
Saktësisht 121 vjet më vonë, më 5 dhjetor 1785, një tjetër anije u mbyt në të njëjtën ngushticë. Edhe këtë herë, pothuajse të gjithë pasagjerët humbën jetën. Dhe sërish, vetëm një njeri shpëtoi — një burrë me të njëjtin emër: Hugh Williams.
Dy aksidente detare që ndodhin në të njëjtën ditë të të njëjtit muaj mund të konsiderohen rastësi. Edhe fakti që në secilin prej tyre mbijeton vetëm një person mund të shpjegohet statistikisht. Por kur i mbijetuari në të dy rastet quhet Hugh Williams, ngjarja fillon të marrë një nuancë misterioze.
Megjithatë, historia nuk përfundon këtu.
Më 5 dhjetor 1860, një anije e tretë – një skunë e vogël me vetëm 21 pasagjerë në bord – u fundos në të njëjtën Ngushticë Menai. Dhe për herë të tretë, vetëm një person arriti të shpëtojë. Emri i tij? Hugh Williams.
Një datë, një vend, tre anije, tre shekuj dhe i njëjti emër. Rastësi e jashtëzakonshme apo një nga ato mistere që historia nuk arrin t’i shpjegojë plotësisht?
