Në një kohë kur Kosova përballet me sfida të mëdha politike dhe kombëtare, po shtohen zërat që kërkojnë unitet brenda spektrit politik të dalë nga lufta. Përmes një letre të hapur drejtuar kandidatit për Kryeministër, Bedri Hamza, ish-ushtarakë, bashkëluftëtarë dhe mbështetës politikë kanë bërë thirrje për bashkimin e Partisë Demokratike të Kosovës me Fatmir Limajn dhe Nismën Socialdemokrate.
I nderuari Z. Bedri Hamza,
Kosova gjendet në një udhëkryq ku vendimet e sotme do të përcaktojnë dekadën tonë të ardhshme. Si prijës i projektit për ndryshim dhe si kandidat për Kryeministër, mbi supet tuaja bie barra jo vetëm e qeverisjes së nesërme, por edhe e bashkimit të sotëm.
Historia e PDK-së dhe e krahut të luftës ka treguar se suksesi është arritur gjithmonë përmes sinergjisë, jo përmes fragmentimit. Kthimi i Fatmir Limajt dhe Nismës Socialdemokrate në shtëpinë e përbashkët nuk duhet parë si një kalkulim i thjeshtë mandatesh, por si një akt i domosdoshëm i pajtimit brenda familjes politike.
Pse ky është momenti i guximit:
Kundërshtarët politikë përfitojnë nga përçarja. Një PDK e hapur dhe gjithëpërfshirëse dërgon mesazhin se jeni gati të udhëhiqni të gjithë vendin, duke filluar nga shtëpia juaj.
Z. Limaj përfaqëson një nr të madh votuesish besnik dhe një përvojë politike që nuk mund të injorohet. Refuzimi nga individë të caktuar brenda strukturave nuk duhet të bëhet pengesë për interesin madhor të fitores.
Ju keni dëshmuar se jeni njeri i numrave, por edhe i urtësisë. Sot, Kosova ka nevojë që ju të jeni “Ura” që bashkon të gjithë ata që ndajnë të njëjtat vlera themeltare.
Z. Hamza, Politika e madhe kërkon zemërgjerësi dhe pragmatizëm. Mos lejoni që egoizmat e vegjël apo inatet e vjetra të dikujt brenda radhëve të sabotojnë projektin tuaj të madh për Kosovën. Një PDK e bashkuar me të gjithë akterët e saj historikë është forca e vetme që mund të garantojë stabilitet dhe zhvillim.
Me respekt dhe besim në vizionin tuaj,
Në emër të një grupi bashkëluftëtarëve, simpatizantëve ,dhe votuesve :
Milaim Sylejmani, ish Shef i Operativës së Brigadës 173 të UÇK-së Gursel e Bajram Sylejmani
