Një postim reflektues nga Florim Useini, Kryetar Nderi i Rrjetit të Bizneseve Shqiptare në Zvicrën Qendrore, ka ngjallur reagime dhe diskutime të gjera në mesin e mërgatës shqiptare. Me titullin “Diaspora në udhëkryq – Koha për t’u zgjuar”, Useini sjell në vëmendje dilemat, frustrimet dhe përgjegjësitë e komunitetit shqiptar në diasporë.
“Shkojmë me gëzim në pushime në vendlindje, por kur kthehemi nuk e dimë: a duhet të gëzohemi pse ishim atje, apo të mërzitemi që gjetëm po të njëjtën gjendje dhe të njëjtën vetëdije?”, shkruan Useini, duke reflektuar ndjenjën e përhershme të përplasjes midis dashurisë për atdheun dhe zhgënjimit nga realiteti i pandryshuar.
Ai ngre pyetje të drejtpërdrejta dhe thelbësore për gjendjen shpirtërore dhe rolin e diasporës në raport me vendlindjen dhe vendin e integrimit:
-
Pse kemi ndjesinë se vetëm ne mbajmë hallet e vendit?
-
Pse nuk shkëputemi krejt nga ky mendim dhe të përqendrohemi në ndërtimin e integrimit dhe të ardhmes së fëmijëve tanë këtu ku jetojmë?
-
Kur do të flasim për veten me një qëndrim të qartë dhe të palëkundur?
Sipas Useinit, diaspora ndodhet në një udhëkryq identitar dhe shoqëror, ku mungesa e qëndrimit të përbashkët, pasiviteti në përfaqësim dhe ndarja mes vendlindjes dhe vendit të ri kanë krijuar një gjendje stagnimi.
Postimi kulmon me një thirrje të fuqishme për vetëdijësim dhe marrje përgjegjësie:
“Koha është sot që të vetëdijësohemi dhe të marrim përgjegjësinë për fatin tonë.”
Si një figurë e njohur në komunitetin e bizneseve shqiptare në Zvicër, Florim Useini vjen jo vetëm me fjalë reflektuese, por edhe me një nxitje të drejtpërdrejtë për veprim. Postimi i tij është një pasqyrë e qartë e gjendjes aktuale në diasporë dhe një ftesë për organizim, përfaqësim dhe forcim të vetëdijes kolektive.
Postimi në Facebook
