Infermierët shqiptarë në Zvicër lidhin ura bashkëpunimi me Kosovën: Alba Health nënshkruan marrëveshje me Ministrinë e Shëndetësisë

- Hapsirë reklamuese -spot_imgspot_imgspot_imgspot_img

Marrëveshja parasheh trajnime profesionale, shkëmbim përvojash dhe projekte të përbashkëta, me synimin që ekspertiza e profesionistëve shqiptarë në Zvicër të kontribuojë në zhvillimin e sistemit shëndetësor në Kosovë.

Profesionistët shqiptarë të shëndetësisë që veprojnë në Zvicër pritet të kontribuojnë me përvojën dhe njohuritë e tyre në zhvillimin e sektorit shëndetësor në Kosovë.

Ministria e Shëndetësisë e Kosovës ka nënshkruar marrëveshje bashkëpunimi me Alba Health, shoqatën që bashkon kompanitë shqiptare të Spitex-it, infermierët dhe profesionistët e tjerë shqiptarë të kujdesit shëndetësor në Zvicër.

Marrëveshja u nënshkrua nga zëvendësministri i Shëndetësisë, Arsim Berisha, dhe kryetari i Alba Health, Ekrem Hasani, bëhet e ditur në njoftimin e Ministrisë së Shëndetësisë.

Në takimin e nënshkrimit morën pjesë edhe anëtarët e kryesisë së shoqatës: Shqipe Halili, Rexhep Rama, Ali Murtaj dhe Nezir Tishuki.

Trajnime, shkëmbim përvojash dhe projekte të përbashkëta

Sipas Ministrisë së Shëndetësisë, marrëveshja krijon mundësi për një bashkëpunim më të strukturuar ndërmjet institucioneve shëndetësore të Kosovës dhe profesionistëve shqiptarë që punojnë në Zvicër.

Fushat kryesore të bashkëpunimit përfshijnë:

  • Shkëmbimin e përvojave dhe praktikave profesionale.

  • Organizimin e trajnimeve për punonjësit shëndetësorë.

  • Edukimin dhe zhvillimin e vazhdueshëm profesional.

  • Realizimin e projekteve të përbashkëta në sektorin e shëndetësisë.

Qëllimi është që njohuritë dhe ekspertiza e krijuar nga profesionistët shqiptarë në sistemin shëndetësor zviceran të shërbejnë për ngritjen e kapaciteteve profesionale dhe përmirësimin e cilësisë së shërbimeve shëndetësore në Kosovë.

Alba Health, një urë lidhëse mes diasporës dhe Kosovës

Alba Health është shoqatë që bashkon kompanitë shqiptare të Spitex-it në Zvicër, të cilat ofrojnë shërbime të kujdesit shëndetësor dhe social në shtëpi, si dhe infermierë e profesionistë të tjerë të këtij sektori.

Ideja për themelimin e shoqatës lindi në vitin 2022 në Bernë, ndërsa themelimi zyrtar u bë në Cyrih, në një ceremoni ku mori pjesë edhe ambasadori i atëhershëm i Shqipërisë në Bernë, Ermal Dredha.

Që në fillim, kryetari i shoqatës, Ekrem Hasani, kishte theksuar se misioni i Alba Health nuk është largimi i profesionistëve shëndetësorë nga Kosova, por krijimi i mundësive për integrim, zhvillim dhe avancim profesional në Zvicër.

Njëkohësisht, synimi është që përvoja e fituar në sistemin zviceran të shëndetësisë të mund të ndahet dhe të vihet në shërbim të vendit të origjinës.

Pas nënshkrimit të marrëveshjes, Alba Health falënderoi Ministrinë e Shëndetësisë, në veçanti zëvendësministrin Arsim Berisha, për mikpritjen dhe gatishmërinë për bashkëpunim me profesionistët shqiptarë në Zvicër.

Bashkëpunimi shtrihet edhe në fushën e rehabilitimit

Përveç marrëveshjes me Ministrinë e Shëndetësisë, Alba Health ka nisur edhe bashkëpunime të tjera në Kosovë.

Së fundmi, shoqata ka lidhur partneritet me kompleksin e Banjës së Kllokotit. Përmes këtij bashkëpunimi, anëtarët e Alba Health do të kenë mundësi t’i referojnë klientët për trajtime rehabilituese, duke përfituar kushte të favorshme.

Bashkëpunimi i ri me Ministrinë e Shëndetësisë synon të krijojë një lidhje më të qëndrueshme ndërmjet përvojës profesionale të diasporës shqiptare në Zvicër dhe nevojave të sistemit shëndetësor në Kosovë.

Lajmi Fundit
- Hapsirë reklamuese -spot_imgspot_imgspot_imgspot_img
Artikujt më të lexuar nga Mërgata
- Hapsirë reklamuese -spot_imgspot_imgspot_imgspot_img