Në ambientet e Konsullatës së Republikës së Kosovës në Cyrih, drejtuesit e Ansamblit të Valleve “Vatra” nga Bülach organizuan një vizitë solemne për të shënuar 30-vjetorin e themelimit të tyre. Me këtë rast, ata i dorëzuan Konsullit të Kosovës një mirënjohje si shenjë respekti dhe falënderimi për mbështetjen e tij në promovimin e aktiviteteve kulturore të komunitetit shqiptar në Zvicër.
Ansambli “Vatra”, i themeluar tridhjetë vjet më parë, është bërë një nga shtyllat kryesore të ruajtjes dhe promovimit të trashëgimisë kulturore shqiptare në diasporë. Përmes vallëzimeve tradicionale, koncerteve dhe pjesëmarrjes në festivale ndërkombëtare, ky ansambël ka luajtur një rol të rëndësishëm në forcimin e identitetit kombëtar dhe në përcjelljen e vlerave kulturore tek brezat e rinj të mërgatës.
Gjatë ceremonisë, Konsulli i Kosovës në Cyrih shprehu mirënjohjen e tij për këtë nderim dhe vlerësoi lartë kontributin e Ansamblit “Vatra”. Ai theksoi se përkushtimi dhe pasioni i anëtarëve të ansamblit janë shembull frymëzues për ruajtjen e gjallë të kulturës sonë, duke e bërë atë pjesë të përditshmërisë së shqiptarëve në Zvicër.
Ky jubile shërben jo vetëm si moment reflektimi për rrugëtimin 30-vjeçar të “Vatrës”, por edhe si nxitje për vazhdimin e misionit të tyre: kultivimin e trashëgimisë kulturore dhe krijimin e urave lidhëse ndërmjet komunitetit shqiptar dhe shoqërisë zvicerane.
