Investimet e huaja në Kosovë kanë rënë dukshëm.
Kryeministri Kurti u ka bërë thirrje investitorëve dhe ndërmarrësve të huaj që t’i sjellin investimet e tyre në Kosovë. Këtë thirrje Kurti e ka bërë gjatë ditës së sotme në Konferencën e Sigurisë, në Mynih.
Në komunikatën e qeverisë është bërë me dije se gjatë kësaj konference, Kurti ka pasur një drekë pune me ndërmarrës të huaj në kuadër të Forumit Angermyer të Politikës dhe Inovacionit, shkruan lajmi.net
Ai i ka njoftuar pjesëmarrësit me reformat e nisura në fusha të ndryshme si drejtësi dhe administratë publike. Po ashtu Kurti u ka bërë me dije ndërmarrësve të huaj se Kosova paraqet një mjedis të përshtatshëm dhe tërheqës biznesor.
Më poshtë e gjeni komunikatën e plotë të qeverisë:
Gjatë Konferencës së Sigurisë në Mynih, Kryeministri i Republikës së Kosovës, Albin Kurti pati një drekë pune me ndërmarrës dhe investitorë të huaj në kuadër të Forumit Angermyer të Politikës dhe Inovacionit, ku prezantoi mundësitë dhe potencialin për investime në Kosovë.
Ai i njoftoi pjesëmarrësit me reformat e nisura në drejtësi dhe administratë publike, prioritetet e qeverisë, planet afatgjate, dhe parametrat ekonomikë të vitit 2021, të cilët tregojnë për rritje të eksporteve, investimeve të huaja, qarkullimit vjetor të bizneseve dhe konsumit privat.
Besimi në qeveri është i madh, shtoi kryeministri dhe kjo është pasqyruar edhe nga përmirësimi rekord vjetor për 17 vende në indeksin e perceptimit të korrupsionit të raportit të Transperancy International. Së fundmi, kemi miratuar ligjin për themelimin e Gjykatës Komerciale, e cila do të jetë në shërbim të rritjes së efikasitetit të trajtimit të konteksteve ekonomike, ndërkaq, që në të njëjtën kohë jemi duke i rishikuar ligjet ekzistuese për Investimet Direkte të Huaja, Investime Strategjike dhe Zonat Ekonomike me qëllim ofrimit të kushteve sa më të favorshme dhe përshtatshme, tha më tej kryeministri Kurti.
Duke i ftuar për të investuar në Kosovë, kryeministri tha se këta indikatorë dëshmojnë se Kosova paraqet një mjedis biznesor, që do të mund ta bëjë Republikën e Kosovës destinacionin më tërheqës dhe konkurrues në Evropën Juglindore për Investime të Huaja Direkte.
