Shkolla Shqipe “Naim Frashëri” në Nyon vazhdon me përkushtim misionin e saj në ruajtjen dhe kultivimin e gjuhës, kulturës dhe identitetit shqiptar te fëmijët e komunitetit shqiptar në Zvicër. Përmes mësimit të gjuhës shqipe, aktiviteteve kulturore dhe edukative, shkolla synon t’u krijojë brezave të rinj mundësinë të ruajnë lidhjen me gjuhën dhe trashëgiminë e tyre, duke u rritur me një ndjenjë të fortë përkatësie dhe respekti ndaj kulturës shqiptare.
Në kuadër të këtij misioni, Shkolla Shqipe “Naim Frashëri” në Nyon shpreh mirënjohjen e saj të veçantë për z. Fatlum Hetemi dhe Shtëpinë Botuese ALBAS në Prishtinë, për donacionin e çmuar me libra, materiale mësimore dhe edukative të destinuara për nxënësit e shkollës.
Ky donacion përbën një ndihmë të rëndësishme për punën e përditshme të mësuesve dhe nxënësve, duke pasuruar bazën e materialeve në dispozicion për zhvillimin e procesit mësimor. Librat dhe materialet edukative janë një mbështetje e drejtpërdrejtë për mësimin më cilësor dhe më tërheqës të gjuhës shqipe.
Në të njëjtën kohë, një mbështetje e tillë merr një rëndësi të veçantë në diasporë, ku ruajtja e gjuhës shqipe kërkon angazhim të vazhdueshëm nga shkollat, familjet dhe komuniteti. Çdo libër i vendosur në duart e një fëmije shqiptar në diasporë është një mundësi më shumë për ta njohur, dashur dhe përdorur gjuhën e të parëve.
Shkolla Shqipe “Naim Frashëri” shpreh gjithashtu një falënderim të veçantë për bashkëvendësin tonë, prof. Besnik Pajaziti, i cili mundësoi krijimin e këtij kontakti dhe bashkëpunimin me Shtëpinë Botuese ALBAS.
Bashkëpunime të tilla dëshmojnë rëndësinë e solidaritetit dhe të bashkëveprimit ndërmjet institucioneve, mësuesve, botuesve dhe pjesëtarëve të komunitetit shqiptar, në funksion të një qëllimi të përbashkët: ruajtjes së gjuhës shqipe dhe përcjelljes së saj te brezat e rinj.
Shkolla Shqipe “Naim Frashëri” në Nyon shpreh mirënjohjen e saj për këtë përkrahje dhe për vëmendjen që Shtëpia Botuese ALBAS i kushton arsimit shqip jashtë atdheut.
Faleminderit z. Fatlum Hetemi, Shtëpisë Botuese ALBAS dhe prof. Besnik Pajazitit për këtë kontribut të çmuar!
Shkolla Shqipe “Naim Frashëri” – Nyon





