Me ftesë të autoriteteve federale dhe lokale zvicerane, Udhëheqësja e Konsullatës së Përgjithshme të Republikës së Kosovës në Gjenevë, znj. Floreta Kabashi, mori pjesë në aktivitetin tradicional “Geneva Welcome Day”, i cili mbledh çdo vit përfaqësues të lartë të diplomacisë dhe institucioneve zvicerane.
Ky aktivitet, i zhvilluar në një atmosferë mirëpritjeje dhe bashkëpunimi, bashkoi Ambasadorë, udhëheqës të misioneve diplomatike pranë OKB-së në Gjenevë, si dhe përfaqësues të institucioneve ndërkombëtare dhe komunitetit lokal.
Nëpërmjet këtij organizimi u ofrua një platformë e rëndësishme për forcimin e marrëdhënieve diplomatike, krijimin e kontakteve të reja institucionale dhe thellimin e bashkëpunimit me Gjenevën Ndërkombëtare, e cila është një nga qendrat kryesore të diplomacisë shumëpalëshe në botë.
Pjesëmarrja e Konsullatës së Përgjithshme të Kosovës në këtë ngjarje thekson angazhimin e vendit tonë për të kontribuar aktivisht në zhvillimin e marrëdhënieve ndërkombëtare dhe përfaqësimin dinjitoz të interesave të Kosovës në Zvicër dhe në skenën ndërkombëtare./Alb’swiss TV/
