Pas një periudhe të gjatë me vapë të fortë, moti në Zvicër ndryshon ndjeshëm këtë të martë. Temperaturat në zonat e ulëta nuk pritet të kalojnë 20 gradë, ndërsa në male pritet borë – një pamje e pazakontë për muajin korrik.
Që gjatë natës dhe në orët e para të mëngjesit janë regjistruar reshje të dendura shiu në pjesë të ndryshme të vendit, ndërsa në pasdite dhe mbrëmje reshjet pritet të intensifikohen dhe nuk përjashtohet mundësia e stuhive.
Paralajmërime për reshje të mëdha
Autoritetet kanë lëshuar një paralajmërim për reshje të forta (në shkallën 2 të rrezikut) në disa rajone alpine, që do të jetë në fuqi deri në orën 21:00 të mbrëmjes. Stabilizimi i motit pritet vetëm në orët e vona të natës së të mërkurës.
Bora zbret në kalime malore
Temperaturat janë ulur ndjeshëm në lartësi dhe bora ka filluar të bjerë në disa kalime malore. Vetëm pak ditë më parë, kufiri i ngricës ishte regjistruar në një rekord mbi 5000 metra. Sot, ai ka rënë në rreth 2300 metra, ndërsa bora mund të bjerë që nga 1800 metra lartësi.
Autoritetet raportojnë për rrugë të mbuluara me borë në Flüelapass (Graubünden), ndërsa në Julierpass, megjithëse nuk ka raportime zyrtare, temperaturat kanë rënë nën zero dhe radarët tregojnë reshje. E njëjta situatë mund të shfaqet në Sustenpass, Splügenpass dhe Furkapass.
Turistët, kujdes!
Edhe në kalimin e njohur Stilfser Joch, pranë kufirit zviceran, ka rënë borë e madhe gjatë natës. Kjo paraqet rrezik për shoferët dhe turistët që udhëtojnë në këto zona.
Vera rikthehet së shpejti
Për fat të mirë, vera do të rikthehet shpejt. Të mërkurën priten temperatura mes 18 dhe 22 gradë në zonat e ulëta, me periudha me diell. Deri në fundjavë, moti pritet të përmirësohet ndjeshëm me temperatura deri në 28 gradë, transmeton 20min.ch
( Foto ilustrim )
SAM24.info
