Në një deklaratë prekëse përmes Instagramit, këngëtarja gjermane e njohur Vanessa Mai ndau me ndjekësit e saj një përvojë personale dhe të dhimbshme shëndetësore. “Disa prej jush ndoshta nuk e dinë ende, por para afro dy vitesh më është diagnostikuar një stad pararendës i kancerit të qafës së mitrës”, tha 33-vjeçarja, transmeton 20min.ch
Shkaktar i kësaj gjendjeje ishte një infeksion me virusin HPV – virusi human i papillomës – një grup virusesh shumë të përhapura që transmetohen përmes kontaktit të drejtpërdrejtë të lëkurës ose mukozës, kryesisht gjatë marrëdhënieve seksuale. Infeksioni me HPV mund të shkaktojë lytha gjenitale dhe forma të ndryshme të kancerit si ai i vulvës, penisit, anusit, gojës dhe fytit – si dhe kancerin e qafës së mitrës, që është ndër pesë llojet më të shpeshta të kancerit te gratë nga mosha 20 deri në 49 vjeç në Zvicër, sipas të dhënave nga Zyra Federale e Shëndetësisë Publike (BAG).
Statistikat janë alarmuese: çdo ditë, një person në Zvicër diagnostikohet me një formë të kancerit të shkaktuar nga HPV – dhe çdo të tretën ditë, dikush humb jetën për shkak të tij. Rreth 85 deri në 90 për qind e të gjithë njerëzve seksualisht aktivë infektohen me HPV gjatë jetës së tyre, pa e ditur shpesh, pasi infeksioni zakonisht kalon pa simptoma.
Mbrojtja më efektive: Vaksina HPVZgjidhja më efikase për parandalimin e infeksionit mbetet vaksinimi kundër HPV. Kjo vaksinë mbron kundër nëntë llojeve të virusit – shtatë prej të cilave mund të shkaktojnë kancer dhe dy të tjerë janë përgjegjës për lythat gjenitale. Vaksina rekomandohet për vajzat dhe djemtë që nga mosha 11 vjeç, përpara fillimit të jetës seksuale. Në kuadër të programeve kantonale të vaksinimit në Zvicër, ajo ofrohet falas për personat nga 11 deri në 26 vjeç.
Megjithatë, edhe gratë që janë vaksinuar duhet të kryejnë kontrolle të rregullta gjinekologjike dhe të bëjnë testin PAP, thekson Krebsliga.ch.
“Kam pasur shumë fat”
Vanessa Mai rrëfen se në momentin e diagnozës ishte, “sa çudi që tingëllon – në njëfarë mënyre e lehtësuar”. “Nuk ishte ende kancer. Ishte vetëm një stad pararendës. Mundëm të vepronim menjëherë.” Ajo iu nënshtrua një operacioni ambulant për heqjen e indeve të prekura dhe sot është mirënjohëse për kontrollin e bërë në kohë. “Po të mos kisha shkuar për kontroll, historia ime do të kishte mundur të kishte një fund krejt tjetër.”
Një mesazh i fortë për gjithë të rinjtë dhe prindërit në Zvicër: parandalimi, informimi dhe veprimi në kohë janë armët më të forta kundër HPV-së dhe kancerit të lidhur me të. Rasti i Vanessa Mai është një kujtesë se edhe njerëzit publikë nuk janë të paprekshëm – por se një kontroll rutinë mund të bëjë diferencën midis jetës dhe vdekjes, transmeton 20min.ch
SAM24.info
