Raportuesja për Kosovën, Viola von Cramon, duke folur në debatin e Komisionit për politikë të jashtme të Parlamentit Evropian për draftin e raporteve për Kosovën dhe Serbinë, është shprehur kritike për gjendjen e mediave në Kosovë.
Ajo ka thënë se sulmet dhe shpifjet ndaj tyre vijnë pikërisht prej politikanëve të nivelit më të lartë.
“Sulmet dhe gjuha diskredituese kundër gazetarëve është e papranueshme, ku një pjesë e përgjegjësisë, fatkeqësisht, bie mbi zyrtarët më të lartë. Megjithatë, Kosova qëndron më mirë në Ballkanin Perëndimor kur është në fjalë liria e shtypit”, ka thënë ajo.
Megjithatë, von Cramon pati lëvdata për Kosovën në përmirësimin e sundimit të ligjit dhe fusha të tjera. Derisa për sanksionet e vendosura kundër Rusisë, von Cramon tha se është dëshmi që Kosova i përket në BE dhe respekton vlerat e saj.
