Drejtoria e Krimeve Ekonomike dhe Korrupsionit në Policinë e Kosovës ka arrestuar dy ish-drejtorë të Telekomit nën dyshimet për keqpërdorim të detyrës zyrtare.
Të arrestuarit mësohet se janë Armend Osaj dhe Trim Musliu.
Ndërsa, nga zyra për komunikim e Telekomit të Kosovës kanë thënë se janë arrestuar dy-ish punonjës.
“Janë dy ish punonjës te Telekomit të Kosovës, që ka kohe që nuk janë pjesë e jona”, thuhet në përgjigjen e Telekomit.
Po ashtu edhe Policia e Kosovës ka konfirmuar arrestimet e sotme në Telekom.
Zëdhënësi i Policisë së Kosovës, Baki Kelani ka treguar se gjatë një operacioni policor të martën u arrestuar katër persona me dyshimin për keqpërdorim të pozitës zyrtare.
“Sot me 30 mars 2021, Policia e Kosovës, me urdhëresë të Gjykatës kompetente ka realizuar një operacion policor, i cili ka rezultuar me arrestimin e katër personave të dyshuar, mbi dyshimin për keqpërdorim të pozitës zyrtare. Operacioni policor është realizuar në rajonin e Prishtinës, ku pas kompletimit të rastit do të jepen informacione shtesë”, tregoi Kelani.
